Hagelschäden: Schaut's auf die Bauern!

I hob echt ka Glück im Garten. War i am Freitag endlich Jungpflanzerl kaufen - eh scho z'spät dran, obwohl i vor Wochen scho g'schrieben hab, dass ma des heuer ned passiert. Eh kloa. Und wer zu spät kommt, den bestraft das Leben.

In mei'm Fall: da Hagel. I stell ausse mein' Salat, die Paradeis, Paprika und paar Kreidl. Bin stolz auf mi, wie schön des heuer worden is. Dann gieß i - und ned amal a Stund später verhagelts ma ois. I hab eh no a Glück g'habt. Des schlimmste was mir passieren kann, san 70 Euro und a paar Stunden Arbeit Schaden. In da Landwirtschaft geht's grad um Existenzen.

Bei uns war's ned so tragisch, auch wenn a jeder hinnicha Weingarten a Drama is. Auf da andern Seiten vom See war's viel schlimmer. Da heißt's solidarisch sein. Deswegen schreib i jetz Spar und REWE a Mail und frag, ob's bei ihnen auch reinhagelt, dass an spanischen Spargel und italienische Paradeis verkaufen in da Hochsaison, meint der Gmoa Trummler.