Ka Alkohol is a ka Lösung

Gmoa Trummler

„Dry January“ – wenn i des scho hör! Und leider hör i des in letzter Zeit immer öfter. Jo eh: Vo Advent über Weihnochtn bis Silvester wird jo praktisch durchgesoffen und gefressen, do gfreit ma si richtig auf a oams Supperl oder an Abend nur mit Tee. Des versteh i scho, mia is a oft so gangen.

Der Gmoa Trummler...

Der Gmoa Trummler...

© BVZ

Owa es is beim Dry January wia bei ollem, was über den Atlantik zu uns kommt: Es geht komplett an unserer Lebensrealität – und oft a jeder Vernunft – vorbei. Bitte, wir hom a Zeit, wo der Verzicht statt Konsum gefördert wird, es nennt sich Fastenzeit. Des ergibt an Sinn, do tuat si jo sunst nix. Owa im Jänner, do beginnen die Bälle und unsere Winzer – a ned der unwichtigste Wirtschaftsfaktor im Burgenland – hom Zeit, dass den Keller ausramen.

Gscheiter warad a „Mäßigungs-März“, wo ma wie die Italiener oder Franzosen wirklich immer nur a Glaserl Wein trinken. Problematisch is jo nie des erste, sondern immer nur des letzte Achterl.